Tilskot til fisketiltak

Kva for tiltak kan få tilskot

Tiltak som kan få tilskot er:

• Informasjon om og forvaltning av villaks, sjøaure og sjørøye.
• Bruksretta forsking og overvaking.
• Tiltak til å betre tilgangen til og moglegheita til fiske for ålmenta.
• Tiltak retta mot rekruttering eller stimulering til fiske.

Kor skal søknaden sendast og krav til innhald i søknaden

Søknad om tilskot skal sendast i Miljødirektoratet sitt elektroniske søknadssenter. Søknader om tilskot til tiltak av lokal karakter skal adresserast til Statsforvaltaren i det fylket søknaden gjeld. Nasjonale tiltak skal adresserast til Miljødirektoratet.

Rett utfylling i søknadssenteret oppfyller kravet til innhald i søknaden. Søknaden skal dokumentere at tiltak som inneber fysiske inngrep i naturen ikkje er i strid med godkjend kommunal plan eller kommunalt vedtak.

Om søknaden inneheld fleire prosjekt, må kvart prosjekt spesifiserast. Søknader om tilskot til tekniske fiskeforsterkingstiltak skal innehalde opplysningar om området der tiltak er lokalisert, mellom anna geografisk namn, vassdrag og arealkategori i kommuneplan eller reguleringsplan.

Søknader om tilskot til fiskekultiveringstiltak og tekniske fiskeforsterkingstiltak må ha lagt ved løyve frå grunneigar, fråsegn frå kommunen og løyve frå Noregs vassdrags- og energidirektorat eller Statsforvaltaren.

Miljødirektoratet og Statsforvaltaren kan krevje at søknaden er basert på ein ferdig driftsplan eller stille som vilkår at driftsplan blir utarbeida. Miljødirektoratet og Statsforvaltaren kan be om utfyllande opplysningar om det er naudsynt for å handsame søknaden.

Informasjon om andre tilskotsordningar

Habitattiltak i anadrome vassdrag som inngår som ein del av arbeidet med regionale vassforvaltningsplanar med tilhøyrande tiltaksprogram, skal søkje ordninga tiltskot til vassmiljøtiltak - generell vassforvaltning. Fisketiltak retta mot innlandsfisk skal òg søkje vassmiljøtiltak - generell vassforvaltning. Søknadar om tiltak mot pukkellaks skal søkje under ordninga tilskot til framande organismar.

Sakshandsaming

Søknadene blir handsama innafor ei budsjettramme fastsett av Stortinget. Sjølv godt kvalifiserte søknader kan bli heilt eller delvis avslått grunna manglande budsjettmidlar.