Ny rapport om dispensasjonar i strandsona

Sivilombodsmannen har undersøkt alle vedtak om dispensasjonar for bygging i strandsona i tre kommunar; Mandal (no Lindesnes), Kragerø og Askøy, frå perioden 2016 til 2019. Det er laga ein rapport for kvar kommune, og ein samla temarapport. I temarapporten oppsummerer Sivilombodsmannen dei sentrale funna som er avdekka i undersøkjingane, og gir konkrete tilrådingar til alle kommunar.

Formålet med rapporten er å gje lokalpolitikarar, tilsette i kommunar, statsforvaltarar, interesseorganisasjonar og andre interesserte ei auka forståing av dei rettslege krava som gjeld ved handsaming av søknader om dispensasjon for byggjing i strandsona.

Her er hovudfunna frå undersøkjingane:

• Kommunane har gjeve mange dispensasjonar for bygging i 100-metersbeltet.
  85 % av søknadene er innvilga.
• Det er feil eller manglar ved fleirtalet av vedtaka der dispensasjon er innvilga.
• Vurderingane av vesentlegheitsvilkåret og av fordeler og ulemper er ofte mangelfulle.
• Ingen av vedtaka inneheld ei særskilt «kan»-vurdering slik plan- og bygningslova krev.
• Kommunane har i varierande grad sendt dispensasjonssøknader til andre styresmakter for uttale.
• Kommunane undersøkjer sjeldan om dispensasjonen er i tråd med statlege og regionale rammer og mål.

Lenke til rapportane finn du vedlagt. Vi oppmodar kommunane om å setje seg inn i rapportane, som også gjev ei god og systematisk framstilling av regelverket for handsaming av dispensasjonssaker.