Vi startar opp overvaking i Sognefjorden

to personar brenn bål med fjorden og vakker himmel i bakgrunnen — No startar vi overvaking av Sognefjorden, eit prosjekt som skal pågå dei neste tre åra. Målet er å få vite meir om "helsetilstanden" til fjorden. Foto: Vegard Byrkjeland Aasen.

I januar 2025 er det oppstart av overvakingsprogrammet som skal gå i Sognefjorden dei neste tre åra. Målet er å kartlegge og overvake tilstanden i fjorden.

Publisert 28.11.2024

Program for å overvake tilstanden i vatnet rundt oss

Overvakingsprogrammet er utarbeidd av Statsforvaltaren som del av vårt embetsoppdrag og krava som ligg i vassforskriftas § 18 og vedlegg V Kap. 1.3 om å sørge for gode og heilskaplege overvakingsprogram for å kartlegge og overvake tilstanden i vassførekomstane våre. Overvakingsprogrammet ligger i lenke i høgremargen, eller under om du les saka på mobiltelefon eller nettbrett.

Verksemder får pålegg om deltaking i spleiselag

Alle verksemder med løyve frå oss, eller som er forskriftsregulert med utslepp til sjø, får pålegg frå oss om deltaking i eit spleiselag for å dekke kostnadane til programmet. Varsel om pålegg vil gå ut i løpet av januar/februar 2025. Kommunane og verksemder regulert av Miljødirektoratet vert og invitert inn i spleiselaget med lik fordeling av kostnader. Statsforvaltaren går inn med omtrent 50 % av den totale kostnaden.

Det vert òg tatt prøver av sidefjordar

I tillegg til eit overvakingsprogram som dekker heile hovudfjordsystemet vil det samtidig bli tatt prøver i sidefjordar for å undersøke påverknad frå spesifikke kjelder. Desse stasjonane blir dekka av verksemder sjølv og/eller kommunane. Desse prøvepunkta er ikkje vist i dette kartet.

Kartet viser Sognefjorden i Noreg med topografiske detaljar som innsjøar, fjell, og dalar. Det er fleire farga punkt merka på kartet, som kan indikere prøvepunkt eller andre viktige stader. Fjorden strekk seg frå vest mot aust, omgitt av fjell og ulike landformer. Stader som Aurland og Lærdal er synlege langs fjorden. — Figur 1: Oversikt over prøvepunkt. Ved dei gule punkta er det vassovervaking, oksygenmåling på botn, miljøgifter og botndyr i sediment. Dei blå punkta markerer stader der det vert tatt prøver som skal analyserast for miljøgifter og botndyr i sediment. Ved dei grøne punkta skal det kontrollerast fjæresone og makroalgar. Foto: Fylkesatlas / Statsforvaltaren i Vestland.

Vi skal ta vassprøver og prøver av sjøbotn

I Sognefjorden skal vi i tillegg til å ta vassprøver av næringssalter, klorofyll og måle oksygen i botnvatnet, gjere undersøkingar av fjæresone og makroalgar i sjøsone for å sjå etter teikn på eutrofiering (overgjødsling). Vi skal òg ta prøver av sjøbotn for å undersøke belastninga av miljøgiftar og om dyra som grev og lever i sediment på botn har gode levevilkår.