Landbrukseigedomar i dødsbu
Dei nye reglane om landbrukseigedomar i dødsbu tok til å gjelde for snart tre år sidan. Arvelova si frist til å overføre landbrukseigedom til ny eigar er tre år etter den tidlegare eigaren døydde.
I arvelova § 99 a, med iverksetting 1. januar 2022, er det sett ein frist for å overføre landbrukseigedom frå dødsbu til ny eigar. Fristen er 3 år rekna frå tidspunktet tidlegare eigar døydde. Føremålet med regelen er å hindre at landbrukseigedomar blir verande i dødsbu over lang tid, då dette kan vere uheldig for både drift og vedlikehald av eigedomen.
Landbrukseigedom er, i denne samanhengen, definert som ein eigedom som har minst fem dekar jordbruksareal eller minst 25 dekar produktiv skog.
Slik reglane no vert praktisert, får landbruksmynde i kommunen melding frå tingretten om kva eigedom det gjeld, og kven som er arvingar. Kommunen har ansvar for å varsle dødsbuet om treårs-fristen.
Mange eigedomar låg i dødsbu før regelendringa kom, og for desse eigedomane vil fristen gå ut 1. januar 2025. Det er verd å merke seg at sjølv om kommunen ikkje har kjennskap til kvar enkelt av desse eigedomane, eller av andre årsaker ikkje har fått varsla arvingane, vil treårs-fristen gjelde.
Dersom landbrukseigedomen ikkje blir overført til ny eigar med tinglyst heimel innan fristen, kan kommunen krevje tvangssal av eigedomen. Etter arvelova § 99 a andre ledd er det mogeleg å søke om forlenging av fristen, dersom det ligg føre særlege grunnar.