Fylhkenålma edtja barkedh luejhtiemidie klijmagaassijste giehpiedidh, jïh båetijen aejkien skaaride gaertjiedidh. Akte vihkeles bielie soejkesjimmiebarkoste lea hijven skovhtevuekieh, nænnoes geajnoeh jïh ruevtieraarjoeh, jearsoes energijefasseldimmie jïh gåetieh jïh jeatjah tseegkeldahkh mah eah maehtieh væjroste vaaltasovvedh, jallh jeatjah ovlæhkoeh eatnamisnie dååjredh. Fylhkenålma edtja aaj viehkiehtidh guktie siebriedahke buektehte dulviem, vyjremem, straejmietsoepkenem jïh jeatjah ietjmies heannadimmieh haalvedh.
Voenges soejkesjimmie klijmajarkelimmide
Fylhkenålma lea goh lïhtse dan nasjovnaale klijmapolitihken jïh tjïrrehtimmien gaskem voenges siebriedahkine. Tjïelth åejviedïedtem utnieh hijven siebriedahkh bïgkedh sijjen årroejidie, jïh klijmaperspektijve akte vihkeles bielie daehtie soejkesjimmeste.
- Fylhkenålma edtja hoksedh tjïelth klijmajarkelimmide nuekies krööhkieh gosse nænnoestimmieh darjoeh. Fylhkenålma lea suerkiefaamoe, gaskem jeatjah byjresasse jïh laantebårran, jïh faamoem åtna tjïelth vaaksjodh, aktegsnænnoestimmieh gïehtjedidh mah eah nuekies klijmajarkelimmide krööhkh, jïh gïrredh soejkesje- jïh bigkemelaaken mietie.
- Fylhkenålma tjïelten gaerviesvoetebarkoem vååksje.
- Fylhkenålma tjïeltide bïhkede klijmabarkosne. Fylhkenålma edtja tjïelkestidh maam staate kreava jïh veanhtede tjïeltijste, jïh seamma tïjjen tjïelten vuajnoeh buektedh voernges åejvieladtjide.