Auka trusselnivå for fugleinfluensa

Veterinærinstituttet (VI) vurderer risikosituasjonen i Norge kontinuerleg. Etter at sjukdommen blei påvist også i Finland, vurderer VI at risikoen for smitte til fuglar i Norge må hevast frå svært låg til låg.

Område med låg risiko for smitte

I risikoområda skal fjørfe og andre fuglar som er haldne i fangenskap ikkje kunna koma i direkte kontakt med potensielt smittefarlege ville fuglar. I tillegg er det forbode med ansamlingar av dyr, som for eksempel fugleutstillingar. Fuglar frå risikoområde kan heller ikkje delta på utstillingar utanfor risikoområdet.

Område med låg risiko: Oslo, Akershus, Hedmark, Oppland, Vestfold, Østfold, Buskerud, Telemark, Aust- og Vest Agder og Rogaland. Lista kan bli utvida viss situasjonen endrar seg.

Portforbodforskrifta gjeld nå

For å beskytta norsk fjørfe aktiverer altså Mattilsynet «portforbudforskrifta» for fjørfe, inkludert hobbyfjørfe. Forskrifta har følgjande krav for områda med risiko for smitte:

• Fjørfe oppheld seg utandørs, skal haldast slik at dei ikkje kan koma i direkte kontakt med ville fuglar; portforbod.
• Det er forbode med ansamlingar av fjørfe, som for eksempel utstillingar, i risikoområde.
• Det er registreringsplikt for hald av fjørfe i risikoområde.

Smittar ikkje til folk

Mattilsynet melder at det ikkje er registrert smitte til menneske. Tiltaka blir innførte for å redusera risikoen for at fjørfe og andre fuglar i fangenskap skal bli smitta. Men i tillegg minner Mattilsynet om at det i heile landet er:

• Utvida meldeplikt til Mattilsynet ved sjukdom eller auka dødelegheit hos fjørfe.
• Krav om at fôr og vatn til fjørfe ikkje skal koma i kontakt med villfugl.

Fylkesmannen i Rogaland har varsla kommunane i fylket om situasjonen. 

Meir informasjon finn du på nettsida til Mattilsynet.

Risikovurderinga til Folkehelseinstituttet.