Søknad om løyve til mudring og utfylling i Gyavatnet, Eigersund kommune

Fylkesmannen i Rogaland har motteke søknad frå Statens Vegvesen om løyve etter forureiningslova §§ 11 og 16. Søknaden omfattar mudring og utfylling i Gyavatnet i Eigersund kommune.

Mudrings- og utfyllingsarbeid er naudsynt i samband med anleggsarbeid knytt til rassikring av Fv 42 langs Gyavatnet, der det mellom anna vert laga ny tunnel i tillegg til ein generell utbetring av vegen. Ein del av massane frå drivinga av ny tunnel, samt massar frå fjellskjeringar, skal nyttast i fyllinga. Det er behov for utfylling i vatnet på to parti, og mudring på et parti. På ein del av området er det mogleg at det i tillegg må sprengjast i fyllingsfot/-kant for å få til rett helling.

Arbeida kan virke negativt på bestanden av fisk (mellom anna aure) i vatnet ved at næringsområde vert tildekka, og at sprenging, tilslamming og avrenning frå finpartikulært material kan gi skadar på fisken.

Det vil i eit løyve mellom anna bli sett krav til at utbyggar fører kontroll med arbeida, og at det vert iverksett tiltak for å hindre spreiing av partiklar frå mudre- og utfyllingsarbeida. Vidare vert det sett vilkår om at massane som nyttast til utfylling skal vere reine, at resipienten skal overvakast, og til støykontroll og handtering av avfall. Dersom det skal sprengjast, kan det i tillegg vere aktuelt å sette vilkår til desse arbeida. Oppmudra massar må leverast til godkjend deponi.

Søknadsdokumenta vert lagt ut til offentlig ettersyn i Eigersund kommune og på nettsidene våre i dokumentlenkjene til høgre.

Eventuelle merknader til søknaden sendast Fylkesmannen i Rogaland, postboks 59 sentrum, 4001 Stavanger, eller fmropost@fylkesmannen.no innan fire veker frå kunngjeringstidspunktet.