Informasjon til elev og føresette om klage på fastsetjing av standpunktkarakter

Kva kan du klage på?

• Du kan klage på korleis standpunktkarakteren i fag og i orden og oppførsel er fastsett. Klageretten gjeld òg dersom du ikkje får talkarakter til standpunkt, altså dersom du får IV. Merk at du ikkje kan klage på undervegsvurdering.
• Vi tilrår deg å ta kontakt med skulen og be om å få ei grunngjeving for karakteren før du bestemmer deg for å klage.

Kven kan klage?

• Du som er elev, eller føresette til elevar under 18 år, har rett til å klage.
• Er du under 15 år må føresette vere einig i at de skal klage.

Frist for å klage

• Klagefristen er 10 dagar frå det tidspunktet du eller dine føresette er gjort kjent med karakteren, eller burde ha gjort dykk kjent med den.
• Ein ny frist på 10 dagar gjeld frå det tidspunktet du eventuelt har kravd og fått ei skriftleg grunngjeving for standpunktkarakteren din.

Slik klagar du

• Skriv kva du meiner er feil i fastsetjinga av standpunktkarakteren din og kvifor.
• Skriv under på klagen. Er du under 15 år, må òg føresette skrive under.
• Send klagen til rektor ved skulen du går på.

Kva skjer når du klagar?

Skulen vurderer først om dei er einig i klagen din. Dersom skulen bestemmer seg for å setje opp karakteren din, eller bestemmer at du skal få ein talkarakter i staden for IV, får du ei grunngjeving for det. Du får ein ny rett til å klage på den nye karakteren.

Dersom skulen ikkje er einig i klagen din, sender dei saka til Statsforvaltaren.

Statsforvaltaren kan avvise klagen, stadfeste karakteren eller oppheve den. Statsforvaltaren vurderer berre om skulen har følgt reglane for fastsetjing av standpunktkarakter.

• Dersom Statsforvaltaren opphevar karakteren i fag, blir saka sendt tilbake til skulen for ny vurdering. Skulen fastset ein endeleg karakter. Karakteren kan bli ståande, eller bli justert opp eller ned.
• Dersom Statsforvaltaren opphevar vedtak om IV, skjer det same. Saka blir sendt tilbake til skulen for ny vurdering, Følgjande reglar gjeld:
  • Dersom klageinstansen opphevar vedtak om IV fordi det ikkje er varsla i tråd med regelverket, skal skulen sette karakter.
  • Dersom skulen fastset ein karakter i den nye behandlinga, får du ein ny rett til å klage. Det same gjeld dersom nytt vedtak om IV blir fastsett på eit anna grunnlag enn det opphavelege vedtaket.
• Ved klage på karakter i orden og oppførsel er det Statsforvaltaren som fastset endeleg karakter.

Lenkjer til opplæringsforskrifta og privatskuleforskrifta for meir informasjon

Opplæringsforskrifta:

• 10-4 Klage på fastsetjing av standpunktkarakter i fag (Udir)
• 10-5 Klage på vedtak om ikkje å fastsetje standpunktkarakter i fag (Udir)
• 10-6 Klage på standpunktkarakter i orden og oppførsel (Udir)   

Privatskuleforskrifta:

• 7-4 Klage på fastsetjing av standpunktkarakter i fag (Udir)
• 7-5 Klage på vedtak om ikkje å fastsetje standpunktkarakter i fag (Udir)
• 7-6 Klage på standpunktkarakter i orden og i oppførsel (Udir)