Skjønnsmidlar til kommunar med høge meirutgifter til pandemihandtering

Stortinget løyva i juni 1,5 mrd. kroner i ekstra skjønnsmidlar til kommunane i landet for andre halvår grunna pandemien. 80 mill. kroner av denne løyvinga blei vidare sett av til kommunane i Vestfold og Telemark. Statsforvaltaren har no fordelt midlane på kommunane i fylket.

- Dei samla meirutgiftene til kommunane i fylket i andre halvår har vore monaleg høgare enn det vi kan kompensere for innanfor denne ramma. 80 mill. kroner er altså ikkje nok til at alle kommunane får dekt sine meirbehov no, seier fungerande statsforvaltar Fred-Ivar Syrstad.

Midlane er fordelte på bakgrunn av smittetrykket i kvar enkelt kommune og kommunane sine rapporteringar om meirutgifter til statsforvaltaren, og er sett i samanheng med auka innbyggartilskot i andre halvår grunna i pandemien.

- I tillegg har vi hatt eit heilskapleg blikk på situasjonen kommunane har stått i, seier Syrstad.

Fleire kommunar var overkompenserte gjennom auka innbyggartilskot i første halvår. Det gjeld kommunar med relativt få smittetilfelle. Desse kommunane har samla sett i stor grad fått dekka sine meirutgifter gjennom året. Dei får ikkje tildelt skjønnsmidlar i denne omgang. Det er òg nokre kommunar med eit visst meirbehov som ikkje får tildelt skjønnsmidlar. Statsforvaltaren vurderer at behovet for kompensasjon, innanfor ei avgrensa skjønnsramme, er større i dei andre kommunane.

I Prop. 24S (2021-2022), som blei lagt fram for Stortinget 26. november, foreslår regjeringa ytterlegare 750 mill. kroner til kommunane i år grunna pandemien. Desse midlane kjem i tillegg til skjønnsmidlane.

Tabellen under syner den kommunevise fordelinga av skjønnsmidlane.