Nytt jordvernbrev: Kommunane må auka innsatsen for å ta vare på matjorda
Landbruks- og matminister Geir Pollestad og kommunal- og distriktsminister Erling Sande gjer kommunepolitikarane merksame på ansvaret dei har for at Noreg skal nå målet om å bygge ned mindre matjord.
Stortinget vedtok i fjor ein ny nasjonal jordvernstrategi, etter framlegg frå regjeringa. Strategien inneheld eit nytt og skjerpa nasjonalt mål for omdisponering av dyrka jord og nye konkrete tiltak for å nå målet.
Dei to statsrådane ber kommunane om å vurdere nøye om det er viktige samfunnsomsyn som ligg til grunn når ein går inn for å omdisponere matjord til utbygging og om ein har vurdert alle alternativ.
Les meir på nettsida til regjeringa.
Tid for planvask
I brevet står det mellom anna:
Det viktigaste kommunestyret kan gjere er å sørge for at kommunen har oppdaterte planar som tek arealutfordringane på alvor. I laupet av det komande året skal kommunestyra vedta nye kommunale planstrategiar, der ein vurderer planbehovet framover. Det er viktig at jordvern blir sett på dagsordenen og prioritert i dette arbeidet.