Nye rapportar om viktige naturtypar i Rogaland

Fylkesmannen legg nå fram tre rapportar som betrar denne kunnskapen.

Sidan 1999 er det arbeidd med å kartlegga 56 naturtypar som er særleg viktige for det biologiske mangfalde etter ein nasjonal metodikk - handbok 13 om verdisetjing av biologisk mangfald. Kartleggingane blir lagra i Naturbase, den nasjonale databasen for å lagra informasjon om naturområde m.a. naturtypar.

Kvaliteten på første generasjon har vist seg å vera svært vekslande og alt i alt for dårleg. Fylkesmannen samordnar ei tre års satsing for å heva kvaliteten. Konsulentane John Bjarne Jordal og Anders Lundberg, Universitetet i Bergen og John Inge Johnsen, Fylkesmannen i Rogaland, gjennomfører denne kartlegginga. Kartlegginga held fram i år og blir tema på ei fylkessamling 18. februar.

Evaluering av Naturbase for Rogaland

Jordal har vurdert kvaliteten på naturtypedata innlagt i Naturbasen i april 2008. Av 1398 lokalitetar kunne ca. 1000 (71%) ikkje godkjennast. For nokre av lokalitetane finst nok informasjon tilgjengeleg i litteratur og andre kjelder. I ein del tilfelle er likevel metoden brukt feil eller utført arbeid er mangelfullt, og kartlegginga må gjerast heilt eller delvis på nytt. Dette arbeidet er nå i gang.

Ei særskilt evaluering er gjort av Bjerkreim og Sauda basert på feltarbeid i 2006-2007. I Bjerkreim er 92 av 104 lokalitetar vurderte. 53 er forkasta, medan dei andre 39 har fått eller bør få supplerande informasjon. I Sauda er 36 av 41 lokalitetar vurderte. 8 er forkasta, medan mange av dei andre 28 har fått supplerande informasjon. Det er dessutan kartlagt 31 nye lokalitetar i Bjerkreim og 37 i Sauda (sjå nedanfor). Arbeidet med kvalitetssikring og supplering vil måtte pågå i mange år enda. Det vert og foreslått ei tematisk og geografisk prioritering i fylket for dei komande åra.

Kartlegging i 2007

John Bjarne Jordal og John Inge Johnsen utførte i 2007 tilleggs- og nykartlegging av prioriterte naturtypar for Fylkesmannen i Rogaland. Rapporten frå arbeidet finn du i lenka nedanfor.

Det er undersøkt, avgrensa og skildra 162 naturtypelokalitetar frå hovudnaturtypane havstrand / kyst (5), kulturlandskap (54), myr (10), ferskvatn / våtmark (26), skog (56) og berg / rasmark (8). I Finnøy, Sauda og Bjerkreim er om lag 80 tidlegare kartlagde område kontrollerte i felt. Mange område er tekne ut på grunn av manglande kvalitetar. Ny verdisetjing og tekst for områda som framleis skal vera med finst i rapporten. Elles er det kartlagt i Eigerund, Forsand, Gjesdal, Hå og Suldal.

• 47 lokalitetar fekk verdien A svært viktig
• 98 lokalitetar fekk verdien B viktig
• 17 lokalitetar fekk verdien C lokalt viktig

133 funn av 38 nasjonale raudlisteartar av lav, mosar, planter og sopp er påviste under feltarbeidet.

Materialet er presentert dels i rapportform, dels i database som vil bli importert til Naturbasen. Det er framleis vesentlege manglar i dekningsgrad og kvalitet på naturtypekartleggingane i Rogaland.

Kulturlandskapet i Rogaland

Som eit ledd i eit landsdekkande prosjekt for å betra kunnskap og forvaltning av kulturlandskapet gjennomførte John Bjarne Jordal og Anders Lundberg naturtypekartlegging i kulturlandskapet i 2005 og 2006. Desse kartleggingane er nå presentert i ein rapport frå Direktoratet for naturforvaltning saman med ei vurdering av kunnskapsstatus om kulturlandskapet i fylket. Rogaland har eit særleg ansvar når det gjeld å forvalta kystlynghei. Det er vald ut 6 særleg viktige såkalla stjerneområde. Desse er:

Høg-Jæren-Synesvarden-området. Siste rest av jærsk kystlynghei og myr, delvis verna Lakssvelafjellet-Ogna/Hellvik. Kystlynghei, særleg store område, internasjonal verdi Hodnefjell-Dale og Helland-Bø, Rennesøy. Kystlynghei og naturbeitemark Sør for Blikshavn, Karmøy. Kystlynghei, av dei mest varierte i Europa Klungtveit-Litlehamar, Suldal. Slåtteenger, naturbeitemark og kyllestuvar