Hugs karenstida etter utanlandsopphald!
Det nærmar seg ferietid og fleire skal til utlandet, eller har arbeidstakarar som kjem frå utlandet. Eig du eller jobbar med husdyr, så skal du ha karenstid for å hindre at ein tek med smitte frå utlandet heim til norske husdyr.
Med pågåande utbrot av munn- og klauvsjuke i Tyskland, Ungarn og Slovakia, er det viktig å vera klar over karenstida før ein har kontakt med norske husdyr. Munn- og klauvsjuke er ein nasjonal liste 1-sjukdom. Det betyr at sjukdomar i denne kategorien reknast som særs alvorlege. Konsekvensane ved utbrot av liste 1-sjukdom er store, og eit større utbrot av slik sjukdom hos husdyr i Rogaland vil gå ut over nasjonal matvareforsyning.
Viss ein er i utlandet, spesielt i områda med sjukdomsutbrot, er det særs viktig å overhalde karenstida for å forhindre smittespreiing til norske husdyr. Hugs at karenstida gjeld for alle, alt frå handtverkaren som har oppdrag i fjoset og andre "fjøsvandrarar" som skal besøke eller jobbe i husdyrrom eller med dyra.
Karenstid: 48 - 72 timar eller ei veke
Munn- og klauvsjuke kan smitte med reiskap, køyretøy, menneske/klede/skotøy som har vore i kontakt med smitta dyr. Difor er det særs viktig å overhalde karenstida om ein sjølv har vore i utlandet eller har arbeidstakarar frå utlandet, spesielt i områder der smitte er påvist!
Viss du har vore i kontakt med klauvdyr eller fjørfe i utlandet, skal det gå minst 48 timar før du har kontakt med norske husdyr. Om du er i kontakt med klauvdyr eller fjørfe i land med alvorleg smittsamme sjukdomar, bør du venta minst 72 timar. Klede, sko eller utstyr som har vore i kontakt med dyrehald i utlandet skal ikkje brukast i norske husdyrrom.
Helsetenestene anbefaler at du ikkje besøker husdyrhald eller jaktar i Slovakia, Ungarn eller restriksjonsbelagte område aust i Østerrike. Om du gjer det, bør det gå minst ei veke før du går inn i norske husdyrhald. Det gjeld alle (dyreeigarar, avløysarar, veterinærar, handverkarar og andre fjøsvandrarar) som har vore i kontakt med husdyr eller vilt.
Dyreeigar er smittevernsjef for eige dyrehald
Med smitteutbrot av alvorleg sjukdom i utlandet, må dyreigar ta smittevern på største alvor. Dyreeigar er smittevernsjef i eige dyrehald og bør sette dei strengaste krav til besøkande/tilsette som har vore i utlandet som skal inn i dyrehaldet!
I lenkja finn du opplæringsmateriell om smittevern på fleire språk Smittevern-smittesikker