Dårleg dyrevelferd kan gje konsekvensar for tilskot

Det er Mattilsynet som forvaltar dyrevelferdslova med kontroll og tilsyn. Landbruksdirektoratet og Mattilsynet har ein samarbeidsavtale med rutinar for korleis etatane skal samarbeida omkring saker som gjeld dyrevelferd.

Mattilsynet skal senda kopi av vedtak til kommunen og Statsforvaltaren i dei tilfella der dei finn svært alvorlege brot på dyrevelferdsregelverket. Det gjeld først og fremst saker der Mattilsynet fattar vedtak om aktivitetsforbod eller avvikling av dyrehaldet, eller saker Mattilsynet klassifiserer som kronisk dårleg dyrehald der det er funne gjentekne alvorlege brot på regelverket over tid. 

Avslag på tilskot i dei mest alvorlege sakene

Når kommunen får kopi av ei dyrevelferdsak frå Mattilsynet, må dei vurdera om husdyrhaldet kan reknast for å vera «vanleg jordbruksproduksjon med godt husdyrhald». Kommunen skal ikkje på sjølvstendig grunnlag vurdera dyrevelferda, men skal nytta Mattilsynet sine vedtak og rapportar. Dersom kommunen vurderer at dyrevelferda er så dårleg at det ikkje kan seiast å vera "vanleg jordbruksproduksjon med godt husdyrhald", skal dei avslå tilskot til den husdyrproduksjonen der det er funne alvorlege brot på regelverket. Dette vil gjelda husdyrtilskotet, eventuelt driftstilskotet og avløysartilskotet.   

Dyrevelferdssaker der forvaltinga har gjort vedtak i 2023 og 2024

Søknadsåret 2023 fekk landbruksforvaltninga i Rogaland oversendt 22 saker frå Mattilsynet – det vil seie saker der det var fatta vedtak om aktivitetsforbod, avvikling eller dyrehaldet var å rekna som eit kronisk dårleg dyrehald. Fem av desse sakene gjaldt føretak som ikkje søkte om tilskot, som difor ikkje var aktuelle å følgja opp i tilskotssamanheng. 14 av desse 22 føretaka fekk avslag på tilskot av kommunen, mens tre føretak fekk utbetalt fullt tilskot. Statsforvaltaren oppheva kommunens vedtak i ei av desse sakene, og fatta nytt vedtak om avslag på tilskot.

Søknadsåret 2024 fekk landbruksforvaltninga oversendt 18 saker frå Mattilsynet. Eitt av desse føretaka søkte ikkje tilskot. 11 av føretaka fekk avslag på tilskot og fem føretak fekk utbetalt fullt tilskot av kommunen. To av sakene er enno ikkje ferdigbehandla hjå kommunen. Statsforvaltaren har varsla omgjering i to av sakene der kommunen har betalt ut fullt tilskot, men har ikkje fatta vedtak enno.