Statsforvaltaren i Rogaland løyver 2,2 millionar kroner til ungdomsteam på Nord-Jæren

Teamet skal jobba for å førebyggja rusmisbruk og kriminalitet blant unge, og skal vera eit supplement til dei eksisterande tenestene i kommunane.

Skal vera der det er behov

Ungdomsteamet skal ha arbeidsstad på sentrale møteplassar som Byterminalen i Stavanger, Ruten i Sandnes og kjøpesenteret Kvadrat. Dei skal også kunne setjast inn i andre prioriterte område ved behov.

Positivt med samarbeid på tvers av kommunegrensene

Statsforvaltaren meiner det er svært positivt at dei fire kommunane på Nord-Jæren ønsker å gå saman om eit konkret prosjekt for hjelpa ungdom som har omfattande hjelpebehov – og samtidig står bak alvorleg kriminalitet. Dei 2,2 millionane me tildeler nå, er for å få prosjektet i gang, fortel statsforvaltar Bent Høie:

– Me registrerer at dette er godt forankra hos ordførarane i kommunane, og inkluderer også samarbeid med politiet, helsetenestene, barnevernet og skulane. Dette er årsaka til at prosjektet nå får tildelt skjønsmidlar for å starta opp. Samtidig oppfordrar me kommunane til å søka midlar frå Statsforvaltaren, på rusfeltet, for å vidareføra prosjektet, seier Høie.

Ekstraløyving til totalt fem kommunar

Statsforvaltaren i Rogaland skal alltid halda tilbake delar av skjønsmidlane til fordeling gjennom året. Prosjektet på Nord-Jæren har fått midlar frå Statsforvaltaren i Rogalands restskjøn i 2024. Fire andre kommunar er også tildelte midlar frå denne potten nå:

Gjesdal: 45 000 (kostnader knytt til ispropp i Figgjoelva og ras i Byrkjedal).

Randaberg: 1 695 000 (til del to av Bærekraftsfylket Rogaland, koordinert av Rogaland fylkeskommune.

Strand: 250 000 (reparasjon av gammal bru).

Karmøy: 210 000 (kostnader med transport av elevar etter vasskade på Ferkingstad skole).