Atomberedskap

Atomberedskap er den beredskapen vi har mot alle typar atomulukker og handlingar som kan føre til radioaktiv forureining og stråleeksponering.

Atomulukker kan skje ved atomanlegg (kjernekraftverk, produksjons- og gjenvinningsanlegg, lagring av brukt brensel og radioaktivt avfall), ved transport av brensel eller reaktordrivne fartøy. 

Organisering av atomberedskapen i Noreg

Nasjonalt - Kriseutvalet for atomberedskap (KU)

Kriseutvalet har ansvar for og fullmakt til å setje i verk tiltak for å redusere konsekvensane etter ei atomulukke. 

DSA er leiar og sekreteriat for KU, og medlemene kjem frå sentrale myndigheiter med særleg ansvar i handtering av ei atomhending (sjå figur lenger nede). Kriseutvalet har òg eigne rådgjevarar.

Regionalt nivå - Statsforvaltaren og atomberedskapsutval

Statsforvaltaren

Statsforvaltaren er Kriseutvalets regionale ledd, og skal ved ei atomhending syte for koordinering av informasjon og krisehandtering, og bidra til å setje i verk samordna tiltak regionalt og lokalt. Statsforvaltaren rapporterer til KU om status og formidler relevant informasjon frå fylket. 

Atomberedskapsutvalet

Fylkesberedskapsrådet i Vestland er òg atomberedskapsutval (FBAU) regionalt, og er leia av statsforvaltaren. Atomberedskapsutvalet skal gjennom koordinering, tilrettelegging og rettleiing medverke til at regionale og lokale etatar etablerer nødvendige planar som del av samordna planverk. FBAU har som oppgåve å samordne og koordinere iverksetjing og oppfølging av sentralt vedtekne tiltak under ei atomhending. 

Lokalt - kommunal beredskap

Kommunane har eit grunnleggande ansvar for å beskytte befolkninga og bedra til å oppretthalde kritiske samfunnsfunksjonar, og skal ha beredskapsplanar for ulike typar hendingar inkludert atomberedskap.

Ved ei atomulukke vil sentralt vedtekne tiltak bli formidla via Statsforvaltaren til kommunane som set dei i verk lokalt. Kommunane rapporterer til Statsforvaltar, og samarbeider med ulike aktørar som t.d. Mattilsynet. Tiltak kan vere t.d. utdeling av jodtablettar, evakuering, og knytt til drikkevassforsyning og landbruk.