Tolv nye vassdrag er prioritert

Tilskot til ugjødsla kantsone i eng er no utvida frå 23 til 35 område. Ordninga er ein del av regionalt miljøprogram i Vestland. Sjå kart og oversikt i omtale av tilskotet.

Til gode for elvemusling, sjøaure og badegjestar

Vassdraga er vald ut fordi dei har særlege kvalitetar eller utfordringar. Her finn vi store vassdrag med elvemusling som Søreelva i Etne og viktige vassdrag for sjøaure som Steinsdalen i Kvam. Av vassdrag med mykje jordbruksareal kan vi nemne Storavatnet i Fitjar, Løyken i Sunnfjord og Tverrgrovi i Fjærland. Næringsrike, små vatn som Opelandstjørni i Voss og Solevatnet i Austrheim er òg med i ordninga.

Aktiv drift av jordbruksareala vil alltid påverke omgivnaden. I mange tilfelle går dyrkamarka ut til elvekanten, og når jordbruksareal ligg nær vassdrag er det risiko for at gjødsel og plantevernmiddel hamnar i vatnet. Tiltaket gjeld både gjødsling og bruk av plantevernmiddel, og vilkåra for tilskotet er strengare enn krava i anna regelverk.

Andre tiltak for å redusere arealavrenning

Med regional vassforvaltingsplan blir det no større innsats på å redusere diffus avrenning frå jordbruksareal. Ugjødsla kantsone i eng er eitt av fleire tiltak, men vil ikkje alltid gi god vasskvalitet aleine. Andre jordbrukstiltak kan vere redusert fosforgjødsling på næringsrik jord, spreiing av husdyrgjødsel tidlegare i sesongen, unngå jordarbeiding om hausten og ha breiare soner med buskar og tre mellom jordbruksareal og vassdrag.