Søknad om utsleppsløyve for Eikefjord vassverk i Kinn kommune

Bakgrunn

Eikefjord vassverk skal etablerast som nytt vassbehandlingsanlegg med membranfilter for reinsing av råvatn frå Vassbotnavatnet. Produksjon av reint vatn skal vere på 45 m³/t i snitt per døgn, totalt 1080 m³ per døgn.

Membranfiltera vil bli vaska ein gong om dagen. Restvatn etter vask som inneheld skyljemiddel og klorløysing, vil bli overført til ei tank før det blir sleppt ut i Hamnaelva. Utslepp frå tanken til elva vil skje jamt over døgnet. Utsleppet vil òg innehalde konsentrat. Innhaldet i konsentratet er det same som i råvatnet, men med tre gonger så høg konsentrasjon. Under kontinuerleg vassproduksjon vil òg 25 % av mengde råvatn bli ført direkte til elva. Dette utsleppet utgjer mellom 2 til 4 l/s konsentrert råvatn.   

Det er ikkje mogleg i dag å knytte utsleppa frå vassverket til kommunalt avløpsnett. Avløpsnettet er planlagt bygd ut samstundes med at ny gang- og sykkelsti langs Hovlandsvegen blir etablert.

Offentleg ettersyn

Saksdokumenta finn du til høgre på denne nettsida.

Merknader til søknaden kan du sende på e-post til sfvlpost@statsforvalteren.no, eller per post til Statsforvaltaren i Vestland, Njøsavegen 2, 6863 Leikanger. Merk saka med referansenummer 2021/16781. Frist for å gje fråsegn er 19. august 2022.

Alle fråsegner vert registrerte i vår postjournal. Alle må difor skrive under med fullt namn.