Statsforvaltaren si rolle og myndigheit i skulemiljøsaker

Kva er føremålet med handhevingsordninga?

Handhevingsordninga handlar om å sikre at eleven får sin rett til eit trygt og godt skulemiljø prøvd av ei myndigheit utanfor skulen. Statsforvaltaren kan gjennom denne ordninga avgjere om skulen har sett inn eigna og tilstrekkelege tiltak i enkeltsaker, og om tiltaka er sett inn i ein skriftleg tiltaksplan i tråd med lovkrava (opplæringslova kapittel 12). Dersom vi finn at skulen ikkje har gjort dette, kan vi påleggje skuleeigar å rette forholdet.

Korleis melder eg sak til Statsforvaltaren?

Du kan melde sak anten ved å følgje lenkja «Melde frå om mobbing eller dårleg skulemiljø», sende oss ei skriftleg melding via meldingsskjemaet, eller du kan ringe til oss på telefon 90 91 50 45. Vår telefontid er måndag til fredag 10:00 – 14:00. Send oss gjerne ei skriftleg melding via meldingsskjema dersom du ikkje får kontakt med oss per telefon, så vil vi gje deg eit svar så snart som råd. Meldingsskjemaet er ein trygg kommunikasjonskanal der du kan sende sensitiv informasjon.

Sjølv om det er ein lav terskel for å melde skulemiljøsak til Statsforvaltaren, er det likevel nokre vilkår som må vere oppfylte:

• meldinga må kome frå eleven, eller føresette med foreldreansvar for eleven, som ikkje har det trygt og godt på skulen
• eleven må på meldingstidspunktet vere elev på den aktuelle skulen
• det må ha gått minst fem arbeidsdagar sidan de har fortalt rektor at eleven ikkje har det trygt og godt på skulen
• meldinga må handle om at eleven no for augeblikket ikkje har det trygt og godt på skulen.

Kva skjer etter du har meldt sak til oss?

Vi ber skulen sende inn dokumentasjon

Dersom du sender inn ei melding til oss, vil vi ringe til deg for å få vite meir om kva som var bakgrunnen for at du melde sak til oss. Vi vil og ringe til skulen for å informere om meldinga. Dersom vilkåra for at vi kan handsame saka er oppfylte, sender vi eit brev til skulen for å be skulen om dokumentasjon knytt til tiltaksplikta.

Skulen får normalt inntil 10 arbeidsdagar på å sende denne dokumentasjonen til oss. Dokumentasjonen skal og sendast i kopi til deg som meldar, med unntak for dokumentasjon som inneheld personopplysningar om andre.

Vi skriv vedtak i saka

Når Statsforvaltaren har mottatt dokumentasjon frå skulen, vurderer vi om tiltaksplikta er oppfylt. Dette gjer vi med bakgrunn i dokumentasjonen vi har fått frå skulen. I nokon saker vil vi og invitere eleven til ein samtale med oss.

Dersom skulen ikkje har oppfylt si tiltaksplikt, kan vi pålegge skuleeigar å rette forholdet. Dette kan innebere at skulen til dømes må undersøkje skulemiljøet grundigare for å vite kva for tiltak dei skal setje inn, eller at dei må sette inn andre eller meir kraftfulle tiltak enn det dei har gjort.

Dersom du er ueinig med vedtaket vårt, kan du klage på vedtaket. Fristen for å klage er tre veker etter du fekk vedtaket.

Vedtak er sendt ut, kva skjer no?

Statsforvaltaren fortset å følgje opp saka heilt til vi finn at pålegga er oppfylte. I denne delen av saksgangen, vil vi rettleie skulen og skuleeigar i korleis dei skal arbeide for å oppfylle pålegget. Dette gjer vi hovudsakeleg gjennom orienteringsbrev. I nokon saker har vi og rettleiingsmøter med skuleeigar og skulen når det er behov for det, og vi har høve til det.

Dersom ein skule eller skuleeigar ikkje viser nokon evne eller vilje til å gjennomføre våre pålegg, kan det vere aktuelt for oss å gi skuleeigar tvangsmulkt. Tvangsmulkta handlar ikkje om å straffe, men om å drive fram handling for at pålegga skal bli oppfylte.

Statsforvaltaren avsluttar saka

Statsforvaltaren avsluttar saka frå vår side når vi finn at skulen har oppfylt pålegga vi ga i vedtaket. Dette betyr at skulen vil fortsetje arbeidet med elevens skulemiljø, men utan å sende oss tilbakemeldingar om status på dette arbeidet .

Dersom du seinare opplever at skulen ikkje gjer det den skal, kan du igjen melde sak til oss. Hugs at du først må snakke med rektor om at du meiner skulen ikkje gjer nok for elevens skulemiljø.