Strålande slåttedag og UKL-jubileum

15-årsjubileet for ordninga Utvald kulturlandskap i jordbruket vart feira på den årlege slåttedagen på Rygnestad og Flateland i Valle. Arrangør var Valle kommune i samarbeid med Setesdalsmuseet og Statsforvaltaren. Eit interessant og innhaldsrikt program på ein varm solskinnsdag trekte mykje folk. Arrangørane anslår at over 100 personar var innom. 

Dagen starta ved Rygnestad museum. Her fekk deltakarane høve til å prøva ljå og rive. Etter servering av slåttegraut var det orienteringar om UKL-ordninga, om jordbruksdrift og om dei store historiske og biologiske verdiane i området.

Vidare kunne deltakarane følgja ei vandring i kulturlandskapet. Der var mykje interessant og vakkert å sjå av spor frå tidlegare generasjonar og resultat av arbeid som dagens grunneigarar har gjennomført med restaurerering av bygningar og kulturmark. Kåvehagen er ein lokalitet med sjeldant mykje solblom. Solblom er fylkesblomen til Agder og ein sterkt truga art.

Beitande dyr utnyttar ressursane og pleier landskapet. På Uppistog gard på Flateland vart det servert smaksprøvar av lokalprodusert mat, mellom anna ulike ostar laga av geitmjølk.

Dagen vart avslutta med servering av setesdalssuppe i Flateland grendehus. Representantar frå Statsforvaltaren takka kommunen, Setesdalsmuseet og grunneigarane for den flotte dagen og for innsatsen med å ta vare på verdiane i kulturlandskapet.