Dårleg utvikling for vipa

Ein ny undersøking utførd av Norsk ornitologisk forening (NOF) avdekker ein urovekkande tilbakegang for vipa i landet. Hekkebestanden i Noreg har gått attende med 75% på 20 år, og dette teiknar ei dyster framtid for denne så karakteristiske fuglen.

Totalt reknar ein med at den norske hekkebestanden av vipe no er mindre enn 10.000 par. Desse tala kjem fram i ein nyleg publisert artikkel i Vår fuglefauna. Forfattarane har samla nye rapportar og registreringar til å laga eit bilete av dagens status, og det ser verre ut enn frykta.

All erfaring syner at ein så kraftig tilbakegang over kort tid er vanskeleg å snu. Med dagens utvikling i landbruket så vil tilbakegangen halda fram, og vipa vil truleg bli fåtallig også på Jæren om 10-20 år. Utviklinga i landbruket bakover i tid gjorde arten svært talrik fram mot 1990. Men overgang til endra driftsformer og meir einsarta jordbruksareal har sidan den tid gitt arten dårlege kår.

For å bremsa den negative utviklinga må me finna driftsmetodar som ivaretar artsmangfaldet i jordbrukslandskapet. Samstundes er det svært viktig å oppretthalda eit variert landskap med dyrka og udyrka mark. Kommunane på Jæren har eit særleg ansvar når anslagsvis 30% av den nasjonale hekkebestanden finst i Klepp, Hå og Time. Her er det nyleg kartlagt viktige hekkeområde for arten som gjer det mogleg å nytta målretta verkemiddel mot dei viktigaste områda saman med gardbrukarar og andre.