Cathrine Stabel Eltervåg blir ny fylkesmiljøvernsjef i Rogaland

Cathrine Stabel Eltervåg vann fram i konkurranse med fleire gode kandidatar. Ho er i dag assisterande fylkesmiljøvernsjef hos Statsforvaltaren i Rogaland.

– Omgjengeleg person med leiarerfaring

Eltervåg har jobba hos Statsforvaltaren i Rogaland sidan 2011. Ho er 42 år, gift, har to ungar på sju og ti år – og bur på Storhaug i Stavanger, men er frå Sandnes. Statsforvaltar Bent Høie er glad for at ho takka ja til stillinga:

– Ho har ein solid fagleg bakgrunn på natur- og miljøområdet – og lang og brei erfaring frå feltet. I rolla som assisterande fylkesmiljøvernsjef har ho også fått leiarerfaring og blitt godt kjent med avdelinga og statsforvaltarembetet. Ho er dessutan ein omgjengeleg person som kjem til å visa igjen i den viktige miljø- og naturomstillinga som Rogaland er inne i, seier Høie. 

– Midt i smørauget

Cathrine Stabel Eltervåg er utdanna marinbiolog, men har også tatt praktisk-pedagogisk utdanning og jobba som lærar før ho kom til Statsforvaltaren i Rogaland for tretten år sidan. Når ein er opptatt av natur og miljø, er det vanskeleg å sjå føre seg ein meir interessant plass å jobba enn i miljøvernavdelinga hos Statsforvaltaren, seier ho:

– Eg er jo midt i smørauget! Her er me i ein posisjon til å kunna påverka, få gjort noko med det me meiner er viktig. Jobben vår betyr noko for natur og miljø. Derfor er det lett å motivera og engasjera seg. Det kan vera hektisk, det står aldri stille, men eg synest det er veldig givande.

Ho tar formelt til i jobben 1. januar 2025.