Geir Skadberg er ny landbruksdirektør
![](/siteassets/fm-rogaland/bilder-fmro/landbruk/skadberg2.jpg)
La oss berre slå det fast med ein gong på ein dag som dette. Dette er ikkje ein aprilspøk. Frå 1. april er Geir Skadberg ny landbruksdirektør hos Fylkesmannen i Rogaland.
Dette innholdet er mer enn ett år gammelt. Informasjonen kan derfor være utdatert.
Som assisterande landbruksdirektør har Skadberg vore konstituert i stillinga etter at forgjengaren Hadle Nevøy pensjonerte seg i vinter. Skadberg var ein av dei seks som søkte jobben – og det var han som til slutt trekte det lengste strået i tilsetjingsprosessen.
Heile yrkeslivet i landbruket
Landbruksdirektøren har ansvaret for landbruksavdelinga hos Fylkesmannen i Rogaland, eit fagmiljø som skal medverka til gjennomføring av nasjonal landbruks- og matpolitikk på ein måte som passar i Rogaland. Avdelinga driv både forvaltning, næringsutvikling, rettleiing og kontroll – og er eit kompetansesenter for kommunane på landbruksområdet.
Då er det viktig å kjenna næringa. Sjølv har Geir Skadberg alltid hatt ein jobb tilknytt landbruket. Lengst fartstid har han frå TINE, først i Møre og Romsdal og deretter i Rogaland. Frå TINE bar det til arbeid med næringsutvikling hos Fylkesmannen i Rogaland. Deretter gjekk turen til Innovasjon Norge der han hadde ansvar for reiseliv og landbruk. Så blei behovet for å arbeida i landbruksforvaltninga såpass sterkt, at det bar tilbake til Fylkesmannen. Først som assisterande landbruksdirektør – og nå altså som landbruksdirektør. Den 54 år gamle siddisen er sivilagronom og har vidareutdanna seg innan både organisasjon- og økonomifag. Ein god ballast å ha med seg i den nye jobben, håper han.
– Eg trur eg vil lika det
– Dersom du liker å stå i spenningsfeltet mellom den nasjonale landbrukspolitikken, lokal- og regionalpolitikken, landbruksforvaltninga og dei verdiskapande landbruksnæringane, er landbruksdirektørjobben rette staden. Og eg trur eg vil lika det. I dette ligg også at stillinga gir høve til å vera med og vidareutvikla landbruksnæringane – kanskje først og fremst gjennom dialog og samarbeid med alle relevante aktørar, seier Skadberg.
Landbruksdirektøren påpeiker at landbrukspolitikken i hovudsak er næringspolitikken for landbrukssektoren, med heilt klare føresetnader for å blir realisert; bønder som vil produsera, ein industri som vil foredla og ein marknad som vil konsumera. Med jordbruksareala som botnplanken.