Priskontrollen gjeld framleis

I forkant av behandlinga i Stortinget blei saka behandla i næringskomiteen. Næringskomiteen gav ei innstilling til Stortinget der fleirtalet i komiteen tilrådde at Stortinget sendte saka tilbake til regjeringa for utgreiing av fleire punkt, og at regjeringa legg fram ein ny proposisjon om endringar i konsesjonslova og tvangsfullbyrdingslova. I tillegg blei det tilrådd at Stortinget ber regjeringa om å presisere overfor landbruksforvaltninga at konsesjonslova si føresegn om priskontroll skal følgjast. Fleirtalet i Stortinget stemte for næringskomiteen si innstilling.

Næringskomiteen si tilråding, som fekk tilslutning frå Stortinget, inneheld blant anna at regjeringa blir bedt om å:

• fastsette at det ikkje skal vere priskontroll ved overtaking av ein eigedom med bustadhus, med mindre overdragingssummen overstig 3,5 mill. kroner.
• kome tilbake til Stortinget med forslag til korleis priskontrollen på reine skogeigedomar kan opphevast.
• kome tilbake til Stortinget med forslag om nødvendig lovendring om å heve arealgrensene for konsesjonsplikt ved erverv av bebygd eigedom og lovbestemt buplikt til 35 dekar fulldyrka eller overflatedyrka jord.
• kome tilbake til Stortinget med forslag om at arealgrensa endrast tilsvarande for odlingsjord etter odelslova § 2.
• foreta ei vurdering av om avgrensinga av beløpsgrenser og arealgrenser for praktisering av priskontroll bør fastsettast i ei forskrift, og ber i tilfelle regjeringa kome tilbake til Stortinget med forslag om å innføre ein slik forskriftsheimel i konsesjonslova.
• vurdere korleis produktive jord- og skogbruksareal på ein eigedom kan bli overdratt som tilleggsjord til eigedomar som har tilstøytande grenser, ligg i nærleiken av, og/eller forpaktast, utan at det skal vere nødvendig å søkje samtykke til deling eller konsesjon. Stortinget ber regjeringa kome tilbake til Stortinget med forslag om ei slik endring.
• greia ut reglar som gjer at skogen på kombinerte jord- og skogeigedomar kan bli unntatt frå priskontroll, og kome tilbake til Stortinget med forslag til endra reglar.