Mattilsynet føreslår å avslutta bekjemping av pærebrann i Rogaland

Pærebrann er ein alvorleg skadegjerar på eple- og pæretre og ei rekke prydplantar. Bakteriesjukdomen er utbreidd på Vestlandet og Sørlandet, og Mattilsynet har prøvd å bekjempa skadegjeraren i fleire tiår.

Endringar i forskrift om tiltak mot pærebrann er no sendt på høyring. Endringane og konsekvensane kan du lesa om på Mattilsynet sine nettsider. På nettsida har du òg moglegheit til å senda inn elektronisk høyringssvar direkte. Frist for å senda høyringssvar er 23. mai 2024.   

Mattilsynet sin bekjempingsstrategi

Noverande bekjempingsstrategi delar kommunane i den delen av landet der det er funne smitte inn i pærebrannsona og bekjempingssona. I pærebrannsona blir skadegjeraren sett på som så etablert at Mattilsynet ikkje har drive bekjemping dei siste åra. Unntaket har vore rundt planteskular som produserer vertsplantar. I bekjempingssona driv Mattilsynet rydding av dei mest utsette vertsplantane. Store delar av Rogaland er i dag plassert i pærebrannsona, men nokre få kommunar og delar av kommunar er i bekjempingssona. I tillegg er det ei førebyggjande sone der det ikkje er funne smitte enno, der Mattilsynet fjernar utsette vertsplantar for å hindra smittespreiing til nye område. 

Ikkje vidare bekjemping av pærebrann i Rogaland

Det er no føreslått at Hjelmeland kommune, delar av Stavanger og Strand kommune (Finnøy, Sør-Talgje, Fogn, Fisterøyene, Halsnøya, Ombo, Stjernarøyene, Idse, Idsal og området nord for Fiskå) og Suldal kommune flyttast frå bekjempingssona til pærebrannsona. Det betyr at heile Rogaland no vil vera i pærebrannsona, og at Mattilsynet ikkje lenger vil driva nokon form for bekjemping av pærebrann i fylket vårt.  

Fleire av områda som no blir føreslått flytta over i pærebrannsona har fruktproduksjon. Produsentane i desse områda får då sjølv alt ansvaret for førebyggjande tiltak. Dette inneber at Mattilsynet ikkje vil fatta vedtak om fjerning av tre og andre tiltak dersom det blir funne pærebrannsmitte i kommersiell epleproduksjon. Dette betyr igjen at fruktprodusentane ikkje vil ha rett på offentleg erstatning.

Bakgrunnen for endringa er at bekjemping av pærebrann i område med mykje smitte ikkje har vore særleg vellukka, og Mattilsynet ønskjer å nytta begrensa ressursar til å hindra at skadegjeraren spreier seg til andre delar av landet. 

Planteskular som driv produksjon av vertsplanter 

Mattilsynet har rydda vertsplanter rundt planteskular som omsett vertsplanter i alle sonene, men vil allereie denne sesongen slutta med det i pærebrannsona. Du kan lesa meir om overgangsordningen for planteskular på Mattilsynet sine nettsider.