Søknad om utfylling i sjø på Kalhammaren i Stavanger

Fylkesmannen i Rogaland har motteke søknad frå Block Berge Bygg AS om løyve etter forureiningslova §§ 11 og 16. Søknaden omfattar utfylling i sjøt i Stavanger kommune.

Omsøkt utfyllingsarbeid er naudsynt i samband med bygging av nytt kontorbygg og gangveg langs sjøkanten. Massar frå sprengingsarbeid på land skal nyttast i utfyllinga. Det er behov for utfylling i sjø på to parti.

Det skal i hovudsak fyllast med sprengstein på eksisterande fylling, men om lag 500 m3 stein skal fyllast direkte på sjøbotn. Sedimenta i utfyllingsområdet er forureina med kvikksølv, PCB, PAH og TBT. Utan særlege tiltak vil fyllingsarbeida føre til oppvirvling og spreiing av forureina sediment. Dette kan gi negative effektar på det marine miljø.

Det er ingen registrerte verna, trua eller sårbare økosystem eller naturtypar nær det omsøkte utfyllingsområdet. Det er heller ikkje gjort biologisk mangfald-undersøkingar i området. I nærleiken av utfylingsområdet ligg Tjuholmen, ein viktig hekkeplass for sjøfugl og voksestad  for to sjeldne plantar, mellom anna den rødlista arten klengelerkespore (Ceratocápnos claviculáta).

Det vil i eit løyve mellom anna bli sett krav til at utbyggar fører kontroll med arbeida, at massane som nyttast til utfylling skal vere reine, at resipienten skal overvakast, og til handtering av avfall. Det kan i tillegg vere aktuelt å sette vilkår om støykontroll og om tiltak for å hindre spreiing av partiklar frå utfyllingsarbeida.

Søknadsdokumenta vert lagt ut til offentlig ettersyn i Stavanger kommune og i dokumentlenkjene til høgre.

Eventuelle merknader til søknaden sendast Fylkesmannen i Rogaland, postboks 59 sentrum, 4001 Stavanger, eller fmropost@fylkesmannen.no innan fire veker frå kunngjeringstidspunktet.