Beredskapspris til statsforvaltar Else-May Botten

– Norsk TotalforsvarsForum er ikkje i tvil om at samfunnet treng eldsjeler med sterke og klare stemmer som let ord bli til handling – i ånda av Totalberedskapskommisjonen – slik vinnaren av beredskapsprisen for sivil sektor har gjort og gjer. Else-May Botten er ein inspirerande lagspelar med stort pågangsmot, som evnar å omsetje det store heilskapsbiletet til forhold regionalt og lokalt og med ein ibuande vilje til å lære av fortida, forstå notida og rigge samfunnet for framtida, heiter det i grunngjevinga for prisen.

Jørgen Roaldset, generalsekretær i Landsrådet for Heimevernet var dagens andre prisvinnar, i forsvarsrelatert sektor. 

Set stor pris på prisen

NTFs styreleiar Kåre-Ludwig Jørgensen gav prisen til Botten. Han løfta fram Botten sitt arbeid for økt kriseforståing og totalberedskap som grunnlag for at ho vinn prisen for 2024.

– Det er utroleg kjekt å få denne typen tilbakemelding. Det set eg veldig stor pris på, seier statsforvaltar Else-May Botten.

Botten har eit særleg engasjement for å auke kriseforståinga i samfunnet.  

– Vi statsforvaltarar har ei viktig samordningsrolle i beredskapsarbeidet. Vi må forstå situasjonsbildet. Å bygge eit felles beredskapslag er viktig. Alle innbyggjarar har ei rolle i eigenberedskap. Vi må ha gode, operative kommunar. Næringsliv og frivilligheita spelar også ei viktig rolle – vi må jobbe på same lag, seier Botten.

Kursar toppleiarar i beredskap

Totalberedskapskurset for toppleiarar i offentleg og privat sektor, som Botten er med å stå i bresjen for, vart omtala slik under utdelinga:

– I Setnesmoen militærleir i Åndalsnes var 30 kursdeltakarar samla i ei veke; ikkje heilt ulikt det som skjer i Kompani Lauritzen. Her fekk leiarane mellom anna innblikk i forsvars- og tryggleikspolitikk samt korleis klimaendringar og økonomisk uro verkar inn og stiller nye krav til samfunnet. I tillegg var det praktiske øvingar som stilte krav til både fysikk, intellekt og klokskap, kunne NRK rapportere frå militærleiren i Møre og Romsdal. Kurset vart ein suksess. Ja, enkelte av deltakarane uttalte til og med at «i mitt liv er det eit FØR og ETTER dette kurset. Initiativet har inspirert andre fylke i landet til å setje i gang kursing av beredskapsaktørar der statsforvaltar, politimeister og HV-distriktssjef leiar an.

Om prisen

Beredskapsprisen er eit resultat av at Norsk TotalforsvarsForum ønskjer å gjere samfunnet medvite om kva beredskap er, og korleis kvar enkelt bør tenkje og handle for å gjere det norske samfunnet meir robust og mindre sårbart i ei krisesituasjon. Beredskapsprisen heidrar personane som gode ambassadørar for beredskap.

Prisen består, forutan heider og ære, av eit grafisk bilete, ei lommelykt og blomar.