Klimasnukonferansen 2023

Dette er 3. året statsforvaltaren og fylkeskommunen saman arrangerer Klimasnukonferansen. Den har blitt ein viktig møteplass for kommunane i Møre og Romsdal. Undertittelen på årets konferanse var den same som i fjor, Natur- og klimakrisa sett i samanheng. Som Else-May Norderhus sa i opningstala: "Dette er ikkje fordi vi ikkje skal fornye oss, men fordi det er så utroleg viktig: klima- og naturkrisa heng saman".

Opptak og gruppearbeid

Opptak frå konferansen ligg ute og vil vere tilgjengeleg fram til 21.12.2023. Vi oppfordrar alle kommunane i Møre og Romsdal til å gå gjennom:

• innlegget til Thea Aske Haugen - og gjennomføre gruppearbeid 1
  • Innlegget ligg 1:46 minutter ut i opptaket frå dag 1
• innlegget til Even Tranmæl - og gjennomføre gruppearbeid 2
  • Innlegget ligg 1:23 minutter ut i opptaket frå dag 2

Oppgåvane til gruppearbeidet og oppsummering av gruppearbeida finn du nedst til høgre på denna sida.

Opptak frå dag ein finn du her: Dag 1 on Vimeo

Opptak frå dag to finn du her: Klimasnu Dag 2 on Vimeo

Thea Aske Haugen viser korleis dei har arbeidd med miljøkrav i plan- og byggesaker i Bergen kommune. Foto: Åsa Fredly. 

Program

I år hadde vi eit spennande program over to dagar. Alle foredraga som vart vist under konferansen er samla til høgre på denne sida. Noko av det vi lærte var:

• 1,5 gradersmålet er tapt, men vi må gjere det vi kan for å begrense den globale oppvarminga til 2 grader (Kikki Kleiven)
• Vi treng meir arbeid i nettverk for kommunalt klima- og miljøarbeid (Toril Fagerbekk)
• Møre og Romsdal ligg på 8. plass i Folkets fotavtrykk (Anne Melbø)
• Tenk på Naturvernforbundet i Møre og Romsdal og innlegget deira neste gong du høyrer ordet "utvalde naturtyper" (Øystein Folden)
• Ikkje berre får vi meir regn i Møre og Romsdal, vi kan få meir tørke også (Renate Frøyen)
• Naturbaserte løysingar gir meirverdi og kan mellom anna også regulere puls og stressnivå hos folk (Asplan viak)
• Dagens arealplanlegging i kommunane er ikkje berekraftig (Gro Sandkjær Hansen)
• Ein klump jord er svært verdifull! (Arne Bardalen)

Foto: Åsa Fredly. Kikki Kleiven ga oss status for klima og natur

Neste år

Vi gleder oss allereie til neste års konferanse. Da gjer vi som i 2021 og slår saman regional plankonferanse med Klimasnukonferansen. Håper vi sjåast i Ålesund i november 2024. Fram til då, som fylkesordførar Anders Riise sa i slutten av opningstala:

"Vi må gjere det rette og ikkje det lette, det skylder vi vår neste generasjon. Vi kan få det til viss vi samarbeider godt i tida som kjem. Det blir krevjande men det er mogleg!»