Fjord-Norge til Internationale Grüne Woche 2017

Som ein av tre regionar valt ut av Landbruks- og matdepartementet og Innovasjon Norge skal Vestlandet representere Noreg på den viktige matmessa Internationale Grüne Woche (IGW). IGW er ikkje berre sentral i det nasjonale omdømmearbeidet kring norsk mat internt og i resten av verda - men òg ei intern skolering og møteplass for lokalmatprodusentar, restaurantar og reiselivsnæring med kortreist kvalitet i sentrum. Deltaking i Berlin er òg eit signal til deltakarane at dei syner engasjement og positiv utvikling i verksemda si. 

Måla for deltakinga er mange: Reiselivsnæringa er allereie internasjonal, og Tyskland er ein viktig del av marknaden for mange. Men mat og opplevingar i kulturlandskapet vert óg ein stadig viktigare del av reiselivsnæringa her heime, og fleire deltakarar - mellom anna Flatheim friluftsgard i Gaular og Skjolden Hotel i Luster - jobbar allereie i overgangen mellom reiseliv og matproduksjon. Lokal mat er ein del av reiseopplevinga og reiseopplevinga ein del av den lokale maten. Difor er det viktig at lokalmatprodusentar, restauranteigarar, kokkar og aktørar i reiselivet møtes - til dømes i arbeidet fram mot IGW.

For prosjektet er meir enn berre ei dryg veke i Berlin. Arbeidet med å kome saman som region Fjordnorge byrja denne veka i Bergen. 16 av dei 18 produsentane var til stades på Smaksverkstad i lokala til restauranten 1877. Restauranten tek med seg si interesse for lokal mat og gode råvarer til Berlin, men allereie no fekk deltakarane ein smak av alt som veks og gror i fjordarmane våre: Bringe av kvige frå Hansgarden i Gjemnes kommune trong knapt vere i nærleiken av steikepanna for å verte smørjemjukt. Både langs Sognefjorden og på Sunnmøre er sjokolade med på å auke verdien av lokale frukt og bær hjå produsentane Sognefjord Sjokolade og Gode Greier. Hjå Balholm i Balestrand boblar det i frukt og bær både med og utan alkohol.

Fram mot messeopning 20. januar skal produsentane, kokkane og koordinatorane hjå Fylkesmannen og Innovasjon Norge setje saman alle råvarene og produkta til ein smaksmeny som skal presentere Fjordnorge. Produsentane står ikkje på stand berre for seg sjølv, men for Noreg, for regionen og alle dei andre produsentane som er representerte. Samarbeid og lagånd er naudsynt når over 400 000 vitjarar skal mettast i løpet av ei kort veke. I år er 30. gongen Noreg er offisielt til stades på IGW, og jubileet vil sjølvsagt verte markert.

Frå Møre og Romsdal deltek

- Hansgarden v/ Anne Katrine Jensen og Kenneth Høyning: Produksjon av økologisk storfekjøt og mjølk, delvis på gamle rasar, og med fokus på dyrevelferd og god utnytting av grovfôrressursar.

- Mosbøen Gard v/ Åse Torvik og Anders Øverås: Produksjon av baksteverk etter gamle tradisjonar, men med moderne vri. Flatbrød og lefser. Gardsbutikk.

- Smia Fiskerestaurant, Mætt & Go Eteri og Landhandleri v/ Stian Rødsand og Olav Kåre Jørgensen: To menn, to restaurantar: Ein med fiskemat og gamle tradisjonar, ein med burgarar av høg kvalitet og landhandelsvarer frå nærområdet.

- Drågen Smokehouse v/ Petter Aune: Laks og aure røykt på gamlemåten med god tid, høg kvalitet og mykje smak.

- Gode Greier v/ Lise Mari Breivik og Ottar Andrè Anderson: Produksjon av saft, syltetøy og andre produkt basert på gardens frukt og bær - etter oppskrifter frå odelsjentas besteforeldre. Gardsbutikk.