Prosjektskjønn for 2026
Statsforvaltaren inviterer kommunane i Møre og Romsdal til å søke på prosjektskjønnmidlar for 2026. Midlane skal gå til fornying og utvikling i kommunane. Dei siste åra har totalramma vore om lag 10 millionar kroner.
Søknadsfrist for prosjektskjønn er 1. juni 2025.
Interkommunalt samarbeid
Satsingsområdet er interkommunale samarbeid, for å bidra til å løyse omstillingsbehovet i kommunane og bidra til ei meir berekraftig og innovativ oppgåveløysing.
Statsforvaltaren i Møre og Romsdal inviterer kommunane til å søkje om prosjektskjønnsmidlar til å omstille seg og for å bygge opp under meir strukturerte og berekraftige interkommunale samarbeid. Vi oppmodar kommunane til å rydde i dei ulike interkommunale samarbeida og søke faste strukturar så langt det er formålstenleg.
Effektivisering og omstilling
Vi prioriterer søknadar som skal støtte effektivisering og omstilling i drifta innanfor dei største sektorane.
For å innvilge midlar til prosjekt, set statsforvaltaren krav om godkjent grunnavtale frå kommunestyret. Dette gjeld alle kommunane som er med på søknaden. For kommunane som allereie har gjort vedtak om strategisk samarbeid (grunnavtale) kan ny søknad baserast på gjeldande avtale om denne høver.
Webinar
Statsforvaltaren vil i løpet av april/mai arrangere eit webinar om handlingsrommet i interkommunale samarbeid. Eigen invitasjon vert sendt ut, sjå eventuelt våre nettsider.
Søk prosjektskjønn: https://prosjektskjonn.statsforvalteren.no/