Utlysning av tilskot til regionalt Klima- og miljøprogram

Formål med tilskotsordninga

Klima- og miljøprogrammet skal bidra til å nå landbrukspolitikken sine mål innan klima og miljø. Prosjekta skal gje auka kunnskap om utfordringar og tiltak, effektive verkemiddel for næringa, god kunnskapsoverføring frå forsking til praktisk jordbruk og oppdatert rådgjeving til næringa innan felta klimagassutslepp, klimatilpassing og vassmiljø.

Prosjekt som får støtte frå programmet skal medverke til å nå følgjande mål:

• Produksjon av mat skal gå føre seg med god ressursbruk og minst mogleg forureining, klimagassutslepp og tap av biologisk mangfald
• Auke miljøbidraget frå landbruket, som kulturlandskap, biologisk mangfald knytt til kulturmark, binding av karbon og produksjon av biogass
• Tilpasse agronomi og dyrkingssystem til endra klimaforhold, med sikte på å oppretthalde eller auke matproduksjonen og ivareta produksjonsressursane

Tema som kjem inn under tilskotsordninga

• Klimatilpassing
• Klimagassutslipp
• Jord og jordhelse
• Naturmangfold/kulturminne i kulturlandskapet
• Forureining til vatn, jord og luft.

Kven kan søkje?

Føretak som arbeider med kunnskapsutvikling eller kunnskapsformidling kan søkje støtte. Døme på aktuelle søkjarar er:

• Utgreiings- og forskingsverksemder (institusjonar)
• Fag- eller næringsorganisasjonar mv.
• Andre føretak

For å kunne søkje må føretaket vere registrert i Einingsregisteret.

Søknad må vere loggført i Altinn med innlogging via ID-porten, innan 1. mars 2025

 Prioriteringar for 2025

Vi prioriterer prosjekt som styrker klimavenleg driftspraksis og kunnskap om klimautfordringar i jordbruket. Statsforvaltaren vil i 2025 prioritere søknader med fokus på følgjande område:

• Styrking av kunnskapsgrunnlaget for oppfølging av vassforskrifta
• Kunnskap om vassmiljø og presisjonsutstyr for redusert avrenning/optimalisering av gjødsling/sprøyting
• Kunnskap kring ivaretaking/omsyn til naturmangfald og kulturminne i landbruket

Søkjar må også legge fram korleis dei planlegg å nå ut med resultatet, samt tiltak for å gje faglege råd til næring/forvaltning.