Klimasnuprisen til innovativ samkøyring

Nimmo er ei programvare som organiserer delt bestillingstransport og samkøyring. Programvara gjer det enklare for folk å reise i lag, og ikkje i kvar sin bil.

– Dette er innovativt og berekraftig. Eit konsept som vi trur både har ei god framtid, og som også kan gi ei god framtid for både folk og natur, seier Botten.

Positivt klimaarbeid

Klimasnuprisen går til nokon som har bidratt særskilt til positiv utvikling innan klimaarbeid i Møre og Romsdal det siste året. Les meir om prisen: Klimasnuprisen | Statsforvaltaren i Møre og Romsdal

Statsforvaltar Botten har leia juryen, som diskuterte seg gjennom fleire nominerte, og til slutt landa på at Nimmo skulle få årets pris. Eit hovudpoeng for juryen var at deling av bilar kan føre til at færre kjøper bil.  

Delt transport – smart transport

– I dag står norske bilar stille 98 prosent av tida. Det er eit stort behov for meir delingsøkonomi. Samkøyring er ein del av løysninga og kan på sikt redusere ein unødvendig stor bilproduksjon. Vi håper Nimmo vil bidra til ein mykje smartare bruk av bilane vi har, seier Botten.

Nimmo blei starta i 2022 av gründerane, Vebjørn Heggdal og Eirik Sandøy Aa. Dei erfarte at køyring av barn til og frå aktivitetar tar veldig mykje tid, og i all hovudsak blir gjort med privatbilar.

Gjer kvardagen enklare

Programvara har blitt prøvd ut i Molde, Ålesund og Trondheim. Her har det vore transport til aktivitetar for barn og unge, slik at foreldre kan la bilen stå og fleire barn kan delta. Alle barn blir plukka opp og satt av på riktig sted til riktig tid. Foreldra får varsel om at deira barn har gått av og på transporten.

– Alle veit at vaner er vanskeleg å endre, med mindre det er snakk om enkle og gode løysingar. Nimmo har laga ein app som enkelt reduserer kvardagsstresset, seier statsforvaltaren.

Vidareutviklar konseptet for fleire brukargrupper

I år har Nimmo fått 7,8 millionar i støtte frå Innovasjon Norge for å vidareutvikle programvara og appen sin.

Selskapet arbeider nå med å tilpasse konseptet til fleire brukargrupper, som seniortransport og jobbtransport.

– Nimmo si løysing kan redusere klimagassutslepp og gi mindre kø. Appen eignar seg like godt på små steder som på store, og kan bli ei god løysing på stader som ikkje har grunnlag for god dekning med kollektivtransport. Nimmo gir slik eit meir berekraftig og inkluderande samfunn, seier Botten.

Universell løysing

At løysinga er universell og kan nyttas av alle, har verka inn på avgjerda om prisen.

– Løysninga til Nimmo kan bli tilpassa all type transport av menneske i byar og tettstader over heile vera. Vi håper at årets pris inspirerer flest mogleg i fylket til å ta i bruk løysinga – og at vi får meir samkøyring, seier Botten.