Studentstipend til smart bruk av tre i Møre og Romsdal

Møre og Romsdal har ei lang historie med trebaserte næringar. Her har vi tradisjonar for produksjon av møblar, skip, dører og vindauge av tre. I dag har vi eit godt regionalt næringsliv basert på råstoff frå skog.

Oppmuntrar til samarbeid
Tredrivaren sitt stipend skal oppmuntre til samarbeid mellom studentar, utdanningsinstitusjonar og trebaserte næringar. Målet er å lage koplingar som på sikt gir kompetanseheving, innovasjon og rekruttering. Innovasjon og nyskaping spelar ei viktig rolle for bruk av tre i framtida. Det er og viktig for trebaserte næringar sin posisjon i sirkulærøkonomien.

Ordninga er open for alle studentar med fag som kan vere relevante for trevare-, treforedling- og byggebransjen i Møre og Romsdal. Kravet er at studentane skal skrive ei studiepoenggjevande oppgåve om ei problemstilling frå ei verksemd i Møre og Romsdal, om verdiskaping og bruk av tre.

Samarbeidet er i seg sjølv eit mål. Det kan gje kompetanseheving i verksemdene, stimulere til innovasjon, legge til rette for rekruttering til bransjen og regionen, og gi motivasjon til studentar innan relevante fagområde. 

Kva:
Stipendet er på kr 10 000 per oppgåve. Det er tenkt å kunne dekke reise og opphald for studentar ved bedriftsbesøk i samband med oppgåva.

Kven kan søke:
Studentar kan søke saman med verksemder i Møre og Romsdal. Studentane skal høyre til eit studieprogram på bachelor- eller masternivå innan eit relevant fagområde. Prosjektideen skal vere godkjent av ein fagleg rettleiar, oppgåva må gi studiepoeng og kunne inngå i ein grad.

Korleis:
Send inn søknad til Tredriveren, Statsforvaltaren i Møre og Romsdal. Løpande frist. Søknaden skal beskrive problemstillinga og ha signatur frå student, rettleiar og verksemd.

Kontaktperson for ordninga:
Christina Qvam Heggertveit, prosjektleiar for «Tredrivaren i Møre og Romsdal»